Unsere traditionelle «Bänkligrill» bym Jubiläumsbänkli vo der TG Muttenz het das Johr nit könne am Originalschauplatz stattfinde, will im Wald kei Füür erlaubt isch.

So het unseri Präsidäntin kurzerhand in ihrem grosse Garte uff die halbi achti für uns ihri Grill ygfüürt und uns Tisch und Bänk parat gmacht. Jede het öppis für der Grill und Salat oder Dessert mitbrocht. Als Apéro het’s e Glesli Uhudler gäh, e letschtjöhrigs Mitbringsel vo unserne Fründe vo Glasing/A. Eigentlig miesst är Ühüdler heisse, wills eim alles zämmezieht vor Süüri… Aber s’Ässe und Trinke isch nit s’Wichtigste gsi, sondern s’Wiederseh mit den andere Dänzerinne und Dänzer. Es het vill z’verzelle gäh, obwohl mir während der ganze bishärige Coronazyt der Kontakt zu allne per WhatsApp-Chat, Mail, Telefon und sogar Briefe ghalte hän. Bym Verzelle isch d’Zyt wie im Flug vergange und wo d’Sunne untergange gsi isch hänn au mir uns nodysnoh verabschiedet.

Sötte mir no lenger nit regulär danze könne, so wärde mir uns sicher bymene ähnlige Aalass wieder träffe.

Und mir hänn wieder emoll gmerkt: «Aus den Augen» heisst nit zwangsläufig au «aus dem Sinn».

Karin Geitz
Bilder Susi Gasser/Karin Geitz