Am 26. Oktober, wenn d Mäss afoht
und Krethi und Plethi dert anegoht
anderi au an d Swiss Indoors gehn
oder glangwylt im Stau ummesteh
gehn achtedryssig und findes glatt
z Rynach in d Halle Weiermatt.
E Graf duet dert die Lyt begriesse,
seit ass sy sich gedulde miesse,
es wurd sich nämmli ebbe gheer
dr Geburtstag vom Margrit Kohler z ehr
zum Fünfenünzigschte griegt sy Maije
au d Marie-Louise darf sich fraije,
bikunnt Bliemli gääl wie Mayonnaise,
doch denn gohts los mit dr Polonaise.
Alli verlehn jetz Tisch und Stiehl
und wärfe sich ins Schlangegwiehl,
paarwys, zviert und denn au z acht
wärde jetz Figure gmacht,
e Schnägg, e Ring und no e andere,
duet me so mitnand durchwandere
d Auge strahle, d Müler lache
will alli Bai das ganz lycht mache.
Alli hän sich useputzt
scheeni Trachte wärde gnutzt,
ob Frau ob Ma, e jede weiss,
die nägschte Tänz die wärde heiss,
muesch s Hirni bruche, richtig zelle
nit uf die aneri Syte welle
d Tanzleiter dien zwar instruiere,
wie me sich sell rächt uffiere,
doch nach hundert Wäggselschritt,
isch me froh wenns Pause git.
Jetz duet e Büffee mit Käs und Kueche,
nach de Bai dr Buuch versueche,
s git so vyli Heerligkeite
wo däm Gaume Freud bereite,
doch warte scho die nägschte Reige
wo me d Könnerschaft ka zeige.
D Andrea als Diitschei (DJ) und dr Megge
dien mit dr Muusig alli wegge
und dr Werner, d Esther, d Karin
zeige sich als Zar und Zarin
und fiehre d Tänzer ohni Noot
au wenn ene öppe dr Schnuuf usgoht.
Bim Muntanellas seit denn d Wilma:
Bini fuule Murmeli, i blybe sta !
Au anderi hole e Wasser, Wy
und lege so e Päusli y.
Am halber zwölfi ändet dr Ball
und me schafft Oornig in däm Saal
Dr Ruedy danggt Leiterinne und Leiter,
d Stimmig isch prächtig, fröölig und heiter.
E Milchkanne nimmt no Spände entgege
und Alli dien sich zum Hälfe bewege.
No vorem Zwölfi isch dr Saal butzt und gschtrählt.
Alli hänn alles – s git nüt wo fählt.
Und die Maischte sin vorem Zwölfi im Bett
will me jo d Summerzyt umgschtellt het.
MM
Bilder: Andrea Weber, Esti und Max Mollenkopf und weitere Teilnehmende
